BEREZIAK

05 Abu 2023

Euripean Bermeo Urdaibai garaile Hondarribian

Hondarribiko XXXVI. Bandera / Mapfre Sari Nagusian etxeko trainerua hirugarren sailkatu da, eta horrela sailkapen nagusian bi puntu galdu ditu.

Bermeo Urdaibaik irabazi du Hondarribiako XXXVI. Bandera - Mapfre Sari Nagusia eta lidertza sendotu du, Hondarribiarekiko tartea handituz. Bou Bizkaiak 19:58ko denbora ezarri du helmugan. Zierbena Bahias de Bizkaiarekiko bi segundotako aldea lortuz. Hondarribia izan da hirugarren, irabazlearengatik bost segundotara. Orio Orialki, bigarren txandan onena izan, eta laugarren postuan sailkatzea lortu du, Lekeition hirugarren txandan arituko direlarik. Oriotarrek estropada bikaina egin dute, eta denbora askoan Bermeo Urdaibairen denboran aritu arren, bizkaitarrek azken luzean lortu dute aldea handitzea eta estropada irabaztea.

Bermeok Eusko Label Ligako lidertzan jarraitzen du 111 punturekin. Hondarribia da bigarren 108 punturekin eta hirugarren postuan da Zierbena Bahias de Bizkaia 102 puntu batuta. Laugarren postuan, berriz, Donostiarra Amenabar dago, 82 punturekin.

Arraun Lagunaken garaipena Hondarribian
Donostia Arraun Lagunak nagusitu da Hondarribiko estropadan (10:48) eta sailkapen nagusiko tartea 5 puntuetaraino zabaldu dute Lugañenekoek. Nortindal Donostiarra bigarren postuan helmugaratu da 2 segundora, Orio Orialki 7 segundora helduta, hirugarren izan da eta laugarren, 17 segundora, berriz, Tolosaldea, lehenengo txandako Hondarribiari ehunenekoengatik gailenduta.

Bigarren txandako lehen luzean Donostiako bi traineruen arteko lehia estua izan da, ziabogara batera heldu direlarik. Bigarren luzearen azken arraunkadetan erabaki da estropada eta azkenean Donostia Arraun Lagunakek bi segundoko aldea atera dio Nortindal Donostiarrari.

Gauzak horrela, Euskotren Ligako sailkapen nagusian Donostia Arraun Lagunakek (58) 5 puntuko abantaila du Orio Orialkirekiko (53). Hirugarren mantentzen da Nortindal Donostiarra 46 punturekin eta Tolosaldea Arraun Kluba laugarren postuan da 44 punturekin. 

Itzuli