Novas 2024
COMPETICION
28 Xu˜ 2024
Bueu, listo para o seu debut na elite
O peirao da vila acollerá o domingo a partir das 11:25 horas as regatas da Eusko Label Liga e Euskotren Liga.
A vila de Bueu cumpre esta tempada un soño colectivo, pois o Club do Mar Bueu Simei estréase na primeira división do remo e este domingo celébrase na vila de Bueu unha das regatas da Liga Eusko Label e Liga Euskotren, concretamente a segunda despois da do sábado na Coruña. Con este motivo, hoxe tivo lugar no salón de plenos da Casa do Concello unha rolda de prensa na que participaron Ricardo Verde, concelleiro de deportes de Bueu, Silvia Carballo, concelleira de turismo, Carmen García, concelleira de cultura, Celso Dopazo, edil de mantemento de vías, Valente Campos, Javier Pazos, e Rosario Freire, do Club do Mar Bueu Simei e Daniel Benavides, Xefe do Servizo Provincial de Deportes da Xunta de Galicia.
Dende o Concello, Ricardo Verde, concelleiro de deportes, destacou que "para Bueu é un pracer acoller este campionato que refrenda a nosa aposta polos grandes eventos deportivos".
Valente Campos, do Club do Mar Bueu Simei, agradeceu "a todos os organismos que colaboran co evento, sobre todo ao Concello de Bueu que está poñendo todo da súa man para que todo saia ben".
A regata deste domingo arrancará ás 11:25 horas co campionato feminino e logo co masculino que se estenderán ata as 14:00 horas segundo a previsión da organización. Daniel Benavides, xefe do servizo provincial de deportes, destacou que "a provincia de Pontevedra está moi ben representada nesta super competición da ACT".